پھلوں و سبزیوں سے دوری کینسر کا خطرہ بڑھائے

کینسر یا سرطان اب ماضی کی طرح لاعلاج مرض تو نہیں رہا مگر اس کا علاج بہت تکلیف دہ اور طویل ثابت ہوتا ہے جبکہ اس کے اثرات کے نتیجے میں بالوں سے محرومی، وزن میں کمی اور کئی دیگر سائیڈ ایفیکٹ کا بھی سامنا ہوتا ہے۔ سبزیاں اور پھل ہوسکتا ہے آپ کو پسند نہ ہو مگر آپ کی غذا سے ان کی دوری کینسر کا خطرہ بڑھا دیتی ہے۔ یہ انتباہ امریکا میں ہونے والی ایک طبی تحقیق میں سامنے آیا۔ امریکن انسٹیٹوٹ فار کینسر ریسرچکی تحقیق کے مطابق کوئی غذا کینسر سے تحفظ نہیں دے سکتی تاہم اگر آپ پودوں سے حاصل ہونے والی غذا (پھل اور سبزیاں) کا زیادہ استعمال کریں تو کینسر کا خطرہ کم کرسکتے ہیں۔ تحقیق میں بتایا گیا کہ پھلوں اور سبزیوں میں شامل اینٹی آکسائیڈنٹس، وٹامن ای،



وٹامن سی اور کیروٹین وغیرہ صحت مند خلیات کو نقصان دہ اجزاءسے تحفظ دے کر کینسر کا خطرہ کم کر دیتے ہیں۔ تحقیق کے مطابق پھلوں اور سبزیوں جیسے پالک، مالٹوں، لیموں، شکر قندی اور گاجر میں پائے جانے والا بیٹا کیروٹین خلیات کو تباہی سے تحفظ دیتا ہے اور اس سے کینسر کا خطرہ کم ہو جاتا ہے۔ تحقیق میں مزید بتایا گیا کہ مخصوص وٹامنز کینسر کی کچھ اقسام سے تحفظ دیتے ہیں تاہم وٹامنز کے ساتھ ساتھ دیگر اجزاءکو بھی غذا کا حصہ بنانے کی ضرورت ہوتی ہے، تاکہ وہ سب مل کر جسم کو بہتر تحفظ فراہم کر سکیں۔ محققین کا کہنا تھا کہ بہت زیادہ چربی والی غذا کینسر کا باعث بنتی ہے۔ انہوں نے مشورہ دیا کہ لوگ غیر صحت مند غذا کو پھلوں و سبزیوں پر مشتمل خوراک سے بدل کر یہ خطرہ کم کرسکتے ہیں۔